弱肉強食係大自然嘅法則,動物之間亦有食物鏈層次高低之分。最近內地一間動物園提供活雞俾遊客餵老虎,有人認為動物園太殘忍,亦有人認為老虎食雞本來就係一間正常不過嘅事,仲轟投訴嘅人太得閒。

近日有遊客投訴江蘇南通動物園,指園方設有向老虎投餵活雞嘅環節,認為該環節太過殘忍。而相關片段亦喺網上流傳,只見遊客拎住隻活雞,然後用力投向老虎附近,老虎即刻過去叼起活雞。園方回應指,投餵活雞可以增加遊客體驗,只是「正常的一個野獸行為展示」,亦通過相關政府備案。

好多內地網民都認為投餵活雞無問題:「食物鏈就是這樣的」、「動物園的存在本身就很殘忍」、「矯情,你自己家不吃雞鴨鵝」,同時揶揄投訴嘅人「太閒」、「哪來的聖母心」,笑言如果覺得唔適合可以「放他進去英雄救雞」。但亦有網民讚同該環節殘忍,殘忍嘅唔係老虎食雞,而係園方俾遊客投餵,並當成特別環節呢一點:「增加體驗度?太可笑了?體驗獸性嗎?」

圖:澎湃新聞