好多人都想有一次話走就走嘅旅行,遼寧丹東東港市就有一對父子唔返工唔返學,揸住一架二手車遊歷內地多個城市,環遊中國足足54日先返屋企。原來兩父子嘅關係唔好,徐爸為修復同囝囝子程嘅關係,同時令佢不再厭學,先策劃咗呢場話走就走嘅旅行。徐爸最後不負所望,同子程關係破冰並越來越親密之餘,更成功令子程對讀書有返興趣。

今年40歲嘅徐爸係一名攝影師,由於工作忙碌,同14歲嘅囝囝子程缺乏交流,加上屋企長輩溺愛,令子程性格變得好叛逆,亦怠慢咗學習。徐爸知道一味說教唔會教好子程,更可能令子程同自己嘅關係越來越差。於是徐爸買咗架二手車,放低自己嘅工作,幫子程請咗假,開始一段只有兩人單獨相處嘅旅程。

呢段旅程一開始就唔多順利,兩人出發幾日後就因小事嘈交、冷戰,好彩兩父子冷靜過後好好溝通解決矛盾。一路上,徐爸帶子程遊歷古城,同佢講下歷史,帶佢試食各地美食,有時又親自下廚。兩人喺旅程中互相依賴、幫忙,多咗溝通,子程亦慢慢敞開心扉,同徐爸傾心事。徐爸仲教子程煮嘢食、攝影,父子間嘅關係亦越來越親密,並以朋友相稱相處。。

喺旅程之前,子程覺得徐爸係「多餘無用」嘅攝影師,呢次旅途佢扭轉咗對徐爸嘅觀感,並願意努力改正自己嘅缺點,做個優秀嘅人。旅程完結之後,親戚們亦都好開心見到子程嘅改變。子程主動表示自己想返去讀書,徐爸就提議將子程學習小組嘅同學聚集埋一齊,提供一間房俾佢哋喺周末嗰陣一齊學習。子程欣然同意,仲主動睇書,好期待返學校學習。

圖:紫牛頭條、漩渦