雖然未必人人都用過痰罐,但睇過下古裝劇嘅人都會大概知佢咩樣。最近國際網購平台Amazon就有賣家竟然將痰罐當生果籃賣,仲聲稱可以當成冰桶裝紅酒、香檳,甚至可以當成結婚禮物。心水清嘅網民一眼就睇出佢嘅原本用途,紛紛留言提醒其他用戶「請不要買它來裝食物」。

Amazon有賣家將傳統用嚟裝痰、小便嘅痰罐標註為「中國傳統水果籃」(Chinese Traditional Fruit Basket)出售,賣家仲介紹話係60年代嘅中國傳統水果籃,可以當做廚房、餐枱上嘅裝飾,仲可以放入生果、蔬菜,或裝滿冰嚟凍酒。用類似關鍵字喺Amazon搜尋,至少有3款外形同商品描述相似嘅產品,價格介乎31.99美金(約248港幣)至58.16美金(450港幣)之間。

目前,該產品頁面已被刪除,但已經喺社交平台引起熱烈討論,有內地網友笑言:「如果外國網友看到了事情真相會不會跑去廁所狂吐呢」、「這個口味有點重呀」、「原來我們用錯了」。仲有網民表示,如果有外國人將生果放喺呢個「傳統水果籃」送俾中國朋友,相信收禮者唔會覺得開心。

圖:Amazon