我哋都知道豬肉同雞肉唔可以生食,一定要徹底煮熟先好食,但原來喺日本某啲地方,有人由細個就開始食生雞肉,甚至當地餐廳、超市都提供生食嘅雞肉,佢哋更加唔知生食雞肉後果可以好嚴重。

據日本傳媒報道,有網民喺社交平台發文指,其實部分九州人有生食雞肉嘅習慣,因此當年輕人要去外地嗰陣,長輩都會特別告誡佢哋:「外地的雞肉不要隨便生吃」,以免佢哋喺異鄉誤食生雞肉,造成食物中毒。

報道指,食用「生雞肉片」嘅習慣喺九州好常見,特別係鹿兒島縣一啲靠山嘅地方,生雞肉唔單止喺餐廳、超市有得賣,仲係常見嘅家庭料理。生雞肉一般會搭配䜴油、生薑或蒜頭等調味料食。為咗令雞肉可以生食,通常會經過特殊加工處理。不過雖然係咁,鹿兒島縣仍然呼籲民眾,唔好俾小朋友、長者或抵抗力較差嘅人食生雞肉。

除咗九州之外,愛知縣政府亦發現,大多數民眾唔知道食生雞肉會有機會感染曲狀桿菌、沙門氏菌,有愛知縣嘅網友更回應:「從來不知道去外地生吃雞肉片是很危險的」。

圖:網上圖片