陶藝屬於一種傳統工藝,而將一門工藝做到爐火純青稱為職人也不為過。現居於浙江杭州—85後陶藝職人曲晶,來自遼寧大連。自2012年起,曲晶就開始鑽研一件喺眾人眼中極其冷門嘅事情—「泥土實驗」。

經過8年多嘅時間,曲晶收集到幾百種泥土並應用喺製作過程,掌握到燒製出唔同質地器物嘅獨門技藝,仲經常喺燒製陶製品未出窯之前,就被預訂一空。曲晶喺25歲時獲得全國美展優秀獎,並受邀到各大國際陶藝交流展,南韓、日本、土耳其等外媒將其讚譽為「中國罕有」。

目前,曲晶喺杭州有一間自己嘅工作室,主要以做茶器、食器、花器等生活器物為主。而選取嘅材料全部來自大自然,過程中不拉胚、不借助機器(拉坯指將製備好踲泥料放喺坯車上,用輪製成型方法製成形狀同尺寸一致嘅坯件),而佢堅持以配比、用雙手摔打,燒製出器型獨特嘅器物。

曲晶獨特嘅創作方式,靈感來源喺8年前中國美術學院陶藝系嘅一次專業課上,佢發現所有人做嘅成品非常相似,創作手法都比較單一,而佢因自己體質敏感,長時間接觸釉料後身體產生不適,就萌生「是不是我們從一開始就被材料限制住了」的思考,於是下定決心改變材料,由源頭上解決問題。一次偶然機會,佢挖咗啲學校後山茶田嘅泥土處理、燒製。從那以後,佢開始收集各地泥土,測試泥土喺唔同配比、厚度、溫度下燒出來嘅狀態,並將呢啲實驗結果運用到自己作品上。佢仲會通過上山挖土嘅過程,觀察路上植物嘅紋路,以找尋創作靈感。 

曲晶指,燒製陶藝唔係一件短暫嘅事,「大概是因為真的喜歡,才會願意慢下來」。「幾天、半個月、甚至更長的時間,等待泥土慢慢發酵」。其中都有好多不可控因素,例如梅雨季泥土濕度較大,可變性就會更多,燒製出來嘅器物唔會係單一嘅純色,表面會有更多星星點點,亦有可能爆出一個氣泡,或形成一處凸起。

曲晶仲表示,「有的時候指甲縫裡泥土的顏色,我也覺得挺好看的」。又指,「我覺得通往每個道路上有很多種可能,我還是喜歡這個事情,並且想把泥土實驗繼續進行下去」。泥土不單止為曲晶帶來觸動感,仲帶來探索嘅慾望。 

圖片來源︰澎湃新聞




曲晶製作嘅作品。




泥土喺唔同配比、厚度同溫度下燒出來會有不一樣嘅色彩。



上山挖土過程中,觀察路上植物嘅紋路,找尋創作靈感。紋路同植物對比圖。