偷拍案件不時都有發生,而一啲高危走光黑點亦令人防不勝防。

有關注婦女團體走訪油尖旺區內30個公共空間及社區設施,包括購物商場、鐵路車站、康樂設施及行人天橋等,發現多個容易成為偷拍狂徒目標嘅黑點。團體亦建議政府制定全面政策措施保障女性免受偷拍嘅威脅,並可考慮成立跨區工作小組檢討。




關注婦女性暴力協會同油尖旺區議會婦女事務工作小組合辦一項有關油尖旺區偷拍問題及應對方法嘅研究,一共邀請9位女性觀察員,考察區內30個唔同嘅公共空間及社區設施,包括購物商場、鐵路車站、康樂設施及行人天橋,並逐一作出評分,於20日公佈報告,評分最差嘅設施係旺角商場T.O.P This is Our Place,偷拍評分為4.22(5分為非常擔憂);考察員認為偷拍者主要透過玻璃圍欄/幕牆偷拍女性裙底,達4.56(5分為非常可能);其次係喺上層偷拍下層女性胸部(4.44)



其次有機會成為容易偷拍嘅黑點為奧海城二期/三期,擔憂評分高達4.17分。主要因為其中庭範圍空曠、扶手電梯兩側大都呈全透明狀態,以及反光地板及鏡面等設計,容易被偷拍狂有機可乘。



車站方面以旺角站最高危,擔憂程度達3.67分,女性觀察員指旺角站作為港鐵其中一個主要轉車站,設有兩層月台,其中扶手電梯及樓梯形成嘅半開放空間為偷拍者製造咗高低差位置,加上大堂及月台人來人往,偷拍者有較好嘅掩護。觀察員亦發現新建嘅玻璃圍欄磨砂貼紙效果不佳,偷拍者能夠透過玻璃圍欄拍到扶手電梯使用者嘅胸口。另外,對比其他港鐵車站,考察員反映旺角站樓梯較斜,包括月台及出入口樓梯,容易製造走光黑點。此外,部分月台座位正對著月台幕門,中間間距較短,可以透過幕門睇清裙底反射。

關注婦女性暴力協會總幹事王秀容女士建議政府制定全面嘅政策措施,以保障女性免受偷拍問題嘅威脅,包括訂立有關設施建築指引、推行女性安全審計工作及加快落實法例上改革等,而區議會亦應持續發揮監察及督導角色。 

圖片來源︰考察員提供