小朋友通常都有一兩隻心愛嘅公仔陪住自己長大,患有唐氏綜合症嘅小朋友亦唔例外。西班牙一間公仔製造商就推出4款唐氏綜合症公仔,呢幾款公仔獲得由西班牙玩具商(AEFJ)頒發嘅「2020年最佳西班牙玩具獎」。呢個獎項別具意義:陪伴每一位小朋友長大嘅公仔唔應該只有一種樣貌。

以製造教育玩具聞名嘅Miniland表示,呢一款唐氏綜合症公仔適合所有小朋友,而唔單止只有唐氏綜合症小朋友可以擁有,佢哋嘅目的係希望讓每一位小朋友可以認識世界嘅多樣性。一開始推出呢款公仔嗰陣,佢哋亦好擔心市場對公仔嘅反應冷淡,不過其市場總監喺接受傳媒訪問嗰陣表示:「意外地(評價)很正面。」

美國一位網誌作者Kelle Hampton有一個唐氏綜合症女兒Nella,Kelle起初唔鐘意市面上出現嘅唐氏綜合症公仔,因為呢啲公仔刻意誇大咗唐氏綜合症小朋友嘅面部特徵,佢擔心呢種設計會令唐氏綜合症小朋友有被孤立嘅感覺。不過隨住Nella慢慢長大,佢開始意識到自己同其他人嘅差異,Kelle希望Nella可以為自己感到自豪。所以,當Kelle見到一款擁有唔同膚色、髮色、細心刻畫五官嘅唐氏綜合症公仔嗰陣,佢迫不及待咁買低送俾Nella。Nella開心攬住公仔,仲幫佢改咗個同自己一樣嘅名。

圖:Miniland