香港藝術館近日聯同收藏家組織「敏求精舍」,舉辦咗一個名為「聚道傳承──敏求精舍六十周年」展覽,展出300多項中國藝術品,比參觀者認識呢啲珍玩古物背後嘅歷史同文化意蘊。

清代雍正年製的粉彩褔壽雙全團花紋碗

展覽上嘅展品種類繁多,當中書畫作品就包括明清時期沈周、文徵明、王時敏同董其昌嘅作品,以及近代新中國名家同香港早期水墨畫家的代表作品。而文物就包括宋元青瓷、白瓷,明清嘅青花瓷器、多彩瓷器,以至剔雕漆器、玉器、竹雕、明式家具同鼻煙壺。

明代嘉靖年製的剔彩海屋添壽蓋盒

為配合展覽,香港藝術館特別邀請咗一班年輕創作人設計,以及重塑古代文人書齋嘅場景。佢哋運用咗多媒體裝置同動畫片段,比參觀者透過擴增實境技術,了解繪畫、陶瓷、玉器和絲織品嘅製作過程,並發掘書齋案頭嘅文房物品同擺設中嘅傳統文人趣味。


1980年代中國畫壇大師吳冠中的作品《華山旭日圖》

展覽由即日起至六月會喺香港藝術館3樓嘅中國文物廳及外銷藝術廳舉行,入場費用全免,有興趣嘅讀者不妨到香港藝術館嘅官網查閱詳情。


圖片來源:香港藝術館