我哋成日都不禁會抱怨自己生活唔如意,但係身體有殘障嘅人,佢哋嘅生活只會比我哋更艱難。來自山西嘅張俊莉自8歲開始癱瘓,整整臥床37年,就算行動不便,佢依然可以憑住自己嘅毅力意志畫出一幅幅美妙嘅畫作。張俊莉嘅願望係成為一位真正嘅畫家,佢表示:「人活著都不容易,不容易的人不止我一個,我覺得自己很幸福。」

據內媒報道,張俊莉6歲前仲同其他小朋友一樣健康,直至佢確診類風濕關節炎。限於當時嘅醫療技術同屋企嘅經濟環境,張俊莉嘅病得唔到及時治療,到8歲嗰年更全身癱瘓,只能夠活動雙手,張俊莉每日只可以瞓喺牀上睇住姊姊、弟弟返學放學。佢嘅媽媽終日以淚洗臉,但張俊莉唔甘心就咁過一世,下決心要搵一條適合自己嘅路。常年臥床嘅張俊莉開始畫畫,經常對住卡通片嚟塗鴉打發時間。

張俊莉18歲嘅時候,佢嘅連載漫畫被《科幻大王》發表,因此獲得人生嘅第一桶金——500蚊人民幣稿費,從此張俊莉開始朝住畫家嘅路進發。但張俊莉嘅病情加劇令佢嘅雙手、手腕關節全部壞死,佢只可以將筆卡係手指間,靠膊頭細微移動嚟控制筆觸。咁樣畫畫絕對唔容易,加上佢無受過專業畫畫訓練,好多時畫唔出想表達嘅嘢,但張俊莉憑住過人嘅意志一一克服,並努力學習素描、油畫技巧。2018年,張俊莉嘅故事被《人民日報》報道,網民睇過佢畫作後稱佢為「女梵谷」,好多網民嚟買佢嘅畫。佢仲建立自己嘅網店「莉莉的畫架」,一邊賣自己嘅畫作,一邊寫網絡小說或記錄自己嘅心情。雖然張俊莉大半生都要喺牀上度過,但佢慶幸自己有父母陪同,所以更加唔想再令父母擔心自己,佢表示:「父母把全部人生用在我身上,我不希望再讓他們傷心。」張俊莉對未來仍然充滿期盼,希望自己可以畫出經典作品,舉辦一個屬於自己嘅畫展,佢表示:「人活着就要開心快樂,每天做一點有意義的事。」

圖:微博@張俊莉812

(張俊莉作品)