好多住宿嘅地方都會要求住客要提前取消訂單先可以退款,不過計劃就總係趕唔上變化。台灣有位網民本來打算新年假期一家人去台東玩,點知網民懷孕嘅姐姐突然血崩,要即刻入醫院開刀。姐姐情況穩定之後,姐夫就聯絡民宿睇下可唔可以退款。點知民宿唔單止同意退款,仲同姐夫講:「你先照顧老婆」,退款嘅事唔急住處理,令網民一家人相當感動。

呢名網民喺facebook群組「爆廢公社二館」發文指,原本佢同屋企人想趁住新年假期去台東玩三天兩夜,但懷孕嘅姐姐喺臨出發前一晚突然血崩,要送去急診室開刀,全家人決定取消台東之行。姐姐順利開完刀後,姐夫先放心處理台東民宿問題。網民貼上幾張姐夫同民宿嘅對話截圖顯示,姐夫同民宿說明情況並出示輸血證明,民宿唔單止同意退款,仲關心問佢「老婆還好嗎?」,並表示退款唔急住處理,先照顧孕婦,令網民一家相當感動。網民原本以為咁突然嘅事,通常店家都唔會退款,畢竟對方都要做生意,但就無諗到民宿嘅回應咁暖心,佢表示,下次有機會一定要去捧場。

網友紛紛大讚民宿嘅做法:「好民宿讚爆,下次有機會也去住」、「好的民宿不會計較這一天一間房是否有人住,台灣人大多是有情的」、「雙贏,很棒的處理方式」、「佛心來的」、「值得用新台幣懲罰一下」、「這樣的商家,生意肯定興隆!」不過就有網友擔心有咗先例,以後會有人濫用同情心:「雖然民宿是做好事,但…po出以後,以後類似退房事件可能就會有很多類似的藉口出現」、「很有同理心的民宿業者,但就怕有心人士會濫用這同理心」。

圖:網上圖片