新冠疫情肆虐,好多打工仔飯碗不保,畢業生就更加難搵工。為此,香港青年協會(青協)推出「資訊及通訊科技人才培訓計劃」,喺電訊業創造100個為期12個月、月薪介乎1.1萬至3.8萬嘅全職初級職位,包括軟件程式編寫員、助理工程師、銷售、市場推廣人員等,為18歲或以上嘅畢業生/準畢業生或工作經驗少於5年嘅青年提供工作機會。

「資訊及通訊科技人才培訓計劃」係香港特區政府防疫抗疫基金之下、專為協助資訊及通訊業創造就業機會而設嘅計劃,由商務及經濟發展局委託、香港青年協會執行,邀請11間電訊公司包括香港寬頻有限公司、香港華為國際有限公司、數碼通電訊集團有限公司等,為18歲或以上嘅青年(本科或非本科畢業生)提供為期12個月嘅工作機會,等年輕人可以喺資訊及通訊科技行業中累積工作經驗,同時為本地業界培育人才。職位空缺包括軟件程式編寫員、助理工程師、平面設計師、數據分析師、顧客服務、銷售同市場推廣人員等,月薪介乎1.1萬至3.8萬港蚊。

「計劃」將會為僱主提供每月薪酬資助,凡聘請無工作經驗嘅新畢業生或準畢業生,資助額為5610蚊,而聘請不多於5年工作經驗嘅青年,資助額為1萬蚊,以12個月為上限。計劃現正接受報名,詳情請參閱:https://yen2.hkfyg.org.hk/top/tc/index.php

圖:香港政府新聞網