新冠肺炎肆虐全球,影響數億人嘅生計,喺呢個艱難時刻,有人雪中送炭真係好激勵人心。美國伊利諾伊州芝加哥一對夫婦20年前喺一間叫做「Club Lucky」嘅餐廳定情,為咗紀念佢哋嘅特別日子,佢哋每年都會嚟呢間餐廳。而今年,佢哋用膳過後慷慨俾咗2000美金(約1.56萬港幣)貼士俾餐廳職員,店員驚訝之餘亦大受鼓舞,餐廳負責人更表示,以後每年2月12號晚7點半都會將46號枱留俾佢哋。

呢對夫婦喺今個月12號重返當初二人首次約會嘅餐廳「Club Lucky」,並喺當年拍拖嘅46號台用膳,佢哋每年同樣日子都會幫襯呢間餐廳以紀念呢個特別嘅日子。佢哋埋單嗰陣留低巨額貼士,感謝餐廳20年嚟給予佢哋嘅美好時光,更讚揚食物同服務水準。

餐廳負責人Jim Higgins表示,呢對夫婦喺呢個艱難時刻為餐廳每個職員帶來笑容,令員工大受鼓舞。佢指只要餐廳一直經營,每年嘅2月12號夜晚7時半,都會留返46號台俾佢哋。

圖:FB@Club Lucky