近期氣炸鍋興起,唔少人鐘意用佢嚟整嘢食,貪佢唔使落油,方便又健康。消委會近日就市面上12款氣炸鍋做測試,發現6款樣本根據說明書嘅指示或代理商提供嘅食譜,氣炸急凍幼薯條產生嘅丙烯酰胺含量(可致癌物質)高於歐盟基準水平,其中一款更超出13倍。另外,消委會亦發現半數樣本有安全隱患,包括手柄最高表面溫度升幅高於標準上限、短路風險增加。

消委會測試嘅12款氣炸鍋價格介乎298至2080蚊不等,發現半數樣本包括普樂氏Proluxury、Denki、Midea、伊瑪牌Imarflex、億世家ecHome及TSK,氣炸急凍幼薯條嘅丙烯酰胺含量高於歐盟基準水平,其中以「伊瑪牌Imarflex」嘅丙烯酰胺含量最高,每公斤薯條達7038微克,比基準水平多13倍。雖然Harrow、德國寶German Pool嘅丙烯酰胺含量最低,少於200微克/公斤,但烹調後大部分嘅薯條仍未煮熟。

另外,消委會測試後發現,普樂氏Proluxury、Harrow及Midea嘅部分內部帶電部分與用戶可接觸部件之間嘅絕緣距離不足,可能增加短路嘅風險。德國寶German Pool及億世家ec Home嘅手柄量得嘅最高表面溫度升幅分別為65K及64K,稍高於標準上限(60K),用戶長期觸摸有機會增加燙傷風險。

最後,消委會建議消費者選購或使用氣炸鍋時,唔可以同其他高耗電量電器共用電源、每次氣炸食物勿超過氣炸鍋最高容量、唔好遮蓋氣炸鍋嘅排氣孔等。

圖:消委會