相信大家都會聽過有人用「豬咁蠢」嚟鬧人,但你又有無諗過其實豬一啲都唔蠢呢?近日美國有研究團隊成功教識豬仔「打機」,而佢更發現豬仔能夠理解遊戲嘅概念,並且會受人類同佢哋之間嘅互動影響,屬於高智商的哺乳動物。


根據外媒報導,美國普渡大學嘅動物行為專家 Candace Croney 早前聯同團隊,嘗試訓練2隻約克郡豬和2隻培品托微型豬玩一款電子遊戲。遊戲玩法簡單,豬仔只係用豬鼻推動遊戲桿,將游標移動到指定位置即可過關,並得到食物作為獎勵。


而實驗結果顯示,約克郡豬喺遊戲中嘅過關率為 70%-78%,而培品托微型豬嘅過關率則為 56%-68%。研究團隊指出, 雖然豬仔不算完全掌握遊戲概念,但佢哋喺一定程度上理解遊戲桿同游標之間存在關係。


圖片來源:The Pennsylvania State University