近期大家嘅焦點都落在油麻地佐敦!這個社區人口密度偏高,又有唔少少數族裔,令好多人都覺得陌生。其實油麻地佐敦係一個多元化兼充滿活力嘅社區居民喺橫街小巷之中,搵到獨特的生活空間,喺這片土地上,唔同族裔嘅人不約而同展現出香港人嘅強勁生命力。

多元文化交融

社企GoodLab CEO陸樺(Warren)嘅辦公室大約1年前落戶佐敦區,佢表示自從社企搬到嚟佐敦之後,行出街就感受到呢度嘅文化交融,亦加深咗對少數種裔嘅了解:「呢度好特別,好多元化,有好多不同背景族裔在此生活。」

至於父親為巴裔,母親為華裔嘅簡仲文,喺佐敦區已經工作十幾年,佢創辦嘅善行體育基會多年嚟紮根於佐敦。佢覺得呢一區嘅人都好友善:「大家唔同種族文化,初時比較難溝通,但近年溝通多咗之後,大家關係都變得幾好。」

不同膚色的對話

Warren早前舉辦咗多項社區活動,包括「各種膚色的對話」,邀請社區內各界人士,包括社企、商界、政府部門、少數種裔與華裔等,最主要嘅目的就係「對話」。佢認為,要做到社區和諧,第一就係要有同理心,大家要了解少數種裔嘅挑戰、世界觀及文化等等!

講座嘅主題包括教育和就業、女性、公共醫療及社會服務、參與社區的機會等,Warren表示:「其中最有啟發性嘅,就係少數種裔中文未必流利,但除咗要令少數種裔學習中文之外,還要思考點樣令佢哋喺屋企、朋輩之間都有練習中文嘅機會,呢樣係最大嘅挑戰。」另外,佢認為大家嘅心態要改變,唔好成日覺得係我哋「幫助」少數種裔:「無話邊幫邊個,因為經常強調幫助,大家嘅關係會變得唔平等,其實少數種裔都一樣可以貢獻社區,應該俾機會佢哋多啲參與社區!」Warren強調,好多少數種裔都係第三第四代,同華人香港人都沒有分別!「大家唔好Label或標籤化,佢哋都係香港人,都熱愛呢個地方!大家應該以開放嘅心去了解,建立溝通嘅網絡。」

簡仲文也認同有部分人標籤咗南亞裔人士:「可能有部分香港人會覺得奇怪,點解咁多人拿著啤酒喺街上傾偈,因而有啲戒心,不過現時共融情況己經好咗好多。」

互相了解最重要

對於點樣改善少數族裔嘅生活,Warren坦言有好多事情要做:「唔可以單靠一兩個方法去解決,我覺得要透過唔同層面去改變,包括政府政策、教育等等,大家都要諗諗,點樣可以令少數種裔更了解本地嘅社會文化,例如少數種裔見到春節都會有啲好奇,但好少主動去睇,社區就有責任邀請佢哋參與華人嘅節日,同樣道理,佢哋嘅活動亦可以邀請華人參與,互相邀請,互相了解。」

至於簡仲文就認為,區內應該開多啲班,教授印度文化、斯里蘭卡文化等,俾華人可以學習溝通!而本地人亦應該向新移民講解多啲本地文化,等佢哋可以更容易適應。其實佢設立善行體育基金,就係希望令唔同種族能夠融合:「我哋歡迎任何種族參加訓練同上堂,包括曲棍球、板球、木棋,唔同種族可以認識唔同的運動,都係文化溝通嘅一種。」

佢認為,呢一區有好多體育設施,包括足球場、曲棍球場、板球場,應該多啲推廣體育活動,將油尖區打造成健康城市,因為團隊運動可以讓不同種族之之間共融。

少數族裔的生命歷程

除咗舉辦講座之外,Warren之前亦同「街坊帶路」合作,舉辦網上導賞團「少數族裔的生命歷程」,行程包括西貢街遊樂場、寶靈中心、廟街嘅餐廳同日用品店、位於新填地街嘅尼泊爾林保族聚集地Kirat Yakthung Chumlung Him Hong Kong,仲有上海街嘅Ananta Tuition Center等,透過區內唔同景點,大家可以認識同感受少數種裔社群嘅生活情況同埋佢哋生活上遇到嘅挑戰。

眾多景點之中,Warren表示最難忘嘅就係佐敦小型商場寶靈中心:「感覺好有趣,因為比較少見尼泊爾服飾,製作好精美,可以感受到佢哋嘅文化,了解到佢哋注重甚麼,係一個幾深嘅體會。」

其實近年政府都增加好多設施去幫助少數種裔及照顧少數種裔嘅需要,就好似今日正式啟用嘅新油麻地圖書館,報刊閱覽室特別提供尼泊爾語嘅報級雜誌,而2019年開幕嘅油尖旺多元文化活動中心,設立目的就係點樣推廣多元文化,推動社區共融。待疫情過後,大家可以暢遊呢一帶,感受香港嘅多元氣息!

圖片來源:LOOOP.HKGoodLab、簡仲文

GoodLab 大約1年前落戶佐敦區,CEO陸樺(Warren)表示令佢加深對少數種裔嘅了解。

Warren早前舉辦「各種膚色的對話」,邀請社區內各界人士進行「對話」。


簡仲文父親為巴基斯坦裔,母親為華裔,佢喜見近年唔同種族溝通多咗。

簡仲文創立善行體育基金,就係希望透過團隊運動令唔同種族融合。

寶靈商業中心內有唔少少數種裔嘅店舖。



Warren對寶靈中心好難忘,認為可以感受到尼泊爾人嘅文化。


喺廟街上亦可見尼泊爾人嘅餐廳同日用品店。


西貢街公園亦係少數種裔聚集地,不過球場附近都係馬路,小朋友打波執波時有機會被車撞,所以佢哋稱之為Danger Park。

2019年年尾開幕嘅油尖旺多元文化活動中心,目的係推廣多元文化,推動社區共融。


油尖旺少數族裔聚腳地分布圖。