過年前係屋企大掃除嘅好日子,好多人都會將唔要、唔用嘅舊物丟走,不過東莞就有個大頭蝦女子,誤將裝有1.1萬人民幣(約1.3萬港幣)嘅袋當垃圾丟咗,好彩多得清潔工人幫佢喺堆填區搵咗一個鐘頭,先失而復得。

東莞市城市管理同綜合執法局塘廈分局喺大年初一接獲陳女士求助,原來陳女士誤將裝有1.1萬人民幣嘅袋連同其他垃圾統一棄置喺諸佛嶺同興轉運站,該轉運站內有近10噸垃圾。為咗縮細搜尋範圍,城管局決定將垃圾壓縮箱運到石潭埔生活垃圾填埋區,派出挖掘機同數名清潔工人協助尋回失物。清潔工人戴上口罩同手套,喺垃圾堆入面搵咗成個鐘,終於搵到陳女士嘅袋,並將裡面嘅1.1萬現金悉數歸還陳女士。

之後,陳女士寫咗一封信,感謝分局職員同清潔工人嘅努力。佢表示塘廈城管分局行動迅速,顛覆咗佢以往對城管嘅印象。佢又感謝清潔工人唔怕辛苦、污糟,喺烈日下助佢尋回失物。

圖:網上圖片