銅鑼灣大坑書館街12號,已經列入發展局第四期「活化歷史建築夥伴計劃」之中,將會活化成大坑火龍文化館,並有望喺今年中秋節順利落成啟用。市民到時有機會欣賞同使用呢座歷史建築之餘,亦可以認識大坑舞火龍、傳統客家文化同歷史。

發展局局長黃偉綸早前喺網誌表示,呢個項目嘅活化工程正進行得如火如荼,並會爭取喺今年中秋節落成啟用。活化完成後,館內將設有展覽廳、以大坑火龍為主題嘅中西餐館、提供教育同體驗嘅工作坊,期望向市民介紹大坑火龍嘅歷史、起源、火龍紥作工藝同典故、舞火龍路線等,推廣客家傳統習俗。

大坑火龍文化館副主席羅詠詩表示,為咗盡量利用有限嘅空間來展示豐富嘅展覽內容,佢哋會加入擴增實境(AR)、虛擬實境(VR)等現代科技元素,令訪客可以透過唔同方式接觸展品,認識大坑火龍同埋該區嘅歷史文化。

圖:發展局網頁