香港中文大學醫學院化學病理學系助理教授江培勇,早前獲選為美國發明家學會(National Academy of Inventors)傑出會員(Senior Member),以表揚佢喺生物科技方面嘅創新研究。江培勇亦係第一位獲選為該學會傑出會員嘅香港高等院校學者,佢表示非常榮幸能夠成為美國發明家學會嘅傑出會員,呢個係對佢同埋佢嘅團隊嘅肯定。

江培勇精於基因組學、生物信息學、計算生物學、統計學等多個範疇,多年來致力研究新一代測序嘅生物信息學數據分析及臨床應用,如無創性產前檢測同癌症檢測。除學術成就以外,江培勇仲將科研發現轉化至臨床應用,協助醫生同病人。佢喺60幾項生物科技發明擁有國際授權嘅共同專利,當中包括「DNA甲基化」嘅研究成果。「DNA甲基化」係指DNA嘅一種生物化學變化,有助追蹤DNA分子嘅來源。喺產前診斷方面,DNA甲基化有助分辨該DNA分子來自母體抑或胎兒。另一方面,DNA甲基化變異亦係癌症出現嘅其中一個訊號。江培勇團隊透過分析血漿內DNA嘅甲基化模式,成功開發出一個生物訊息平台以進行多種癌症(如肝癌、鼻咽癌)嘅無創早期檢測。

江教授表示,能夠將研究成果轉化為有用發明,等更多人透過早期檢測及早搵出及治療疾病,係作為一個生物醫學科研人員嘅最大成就,「我們希望生物科技未來會成為香港科研及經濟發展的其中一根支柱。」

圖:中大