踏正年初一,相信每家每戶都總有一啲以牛為主題嘅裝飾同擺設,以「送鼠迎牛」。不過你又有無諗過今年嘅主角,其實正面對瀕臨絕種的問題,而且好需要大家嘅關注呢?其實嘉道理農場嘅團隊喺過去幾年時間一直都致力於保育野牛,而佢哋亦多次走訪柬埔寨同中國雲南,進行唔同嘅保育工作,讓當地嘅爪哇野牛同印度野牛可以安安樂樂咁繼續生活。


野牛並非野化家牛


香港常見嘅黃牛

可能你會問「牛點會瀕臨絕種呀,明明大嶼山都有好多啦!」,但其實野牛同我哋喺香港成日見到嘅水牛、黃牛喺有分別嘅。野牛不但係體型上比家牛重得多,佢哋頭上嘅角更加喺唔會脫落、同埋唔會有分支嘅。最重要嘅係,野牛未被人類馴化成家養嘅牲畜,依然係生活喺野外嘅野生動物。


柬埔寨東部嘅爪哇野牛


爪哇野牛嗁四肢同臀部都為白色,而成年公牛嘅體重更可達800kg

爪哇野牛主要分佈喺柬埔寨、印尼、馬來西亞,以及緬甸等地,其中柬埔寨東部平原生態區嘅落葉龍腦香林更加係爪哇野牛最主要嘅棲息地,住咗全球過半數嘅爪哇野牛。由於呢種牛嘅野外種群數量喺過去30年已大有幅下降30%,全球只剩低少於8000隻,所以佢就被國際自然保育聯盟(IUCN)嘅紅色名錄列為瀕危(Endangered)。


落葉龍腦香林係東南亞保存得最完好同面積最嘅旱生森林

因此,嘉道理農場嘅保育團隊亦因此被邀請到當地進行保育工作。由於團隊發現當地嘅居民較為貧窮,主要依靠到森林砍伐樹木、捕獵野牛去維持生計,所以佢哋就出資係當地成立咗一隊森林巡護隊,進行反盜獵、反砍伐嘅工作,去保護爪哇野牛,同埋佢哋嘅棲息地。


森林巡護隊嘅反盜獵、反砍伐工作

除此之外,保育團隊亦重視教育工作,因為佢哋明白只有將保育嘅種子種喺當地人嘅心入面,先可以長久地保護到爪哇野牛。所以團隊就喺當地社區舉辦講座,並請嚟藝術家同小朋友一齊畫一幅有關森林嘅壁畫,試圖從根源著手,提高當地人嘅生態保育意識。


有關保育嘅社區活動

雲南西雙版納嘅印度野牛


印度野牛係世上最高嘅牛科動物,成年公牛肩高可達2.2米,體重更可達1噸

印度野牛主要分布於東南亞及印度次大陸,而喺中國僅僅分布喺雲南南部同西藏南部。雖然印度野牛嘅情況比爪哇野牛好,全球有大約6000-21000隻,並且只被國際自然保育聯盟(IUCN)嘅紅色名錄列為易危(Vulnerable)。不過雲南嘅種群只有200隻,而且佢哋長居於當地拉祜族村同邊嘅山林,喺中國嚟講係比較難得,同樣有保育嘅價值。


保育團隊為當地嘅護林員進行培訓

於是,嘉道理農場嘅保育團隊就同雲南省綠色環境發展基金會、以及當地嘅林業局合作,進行印度野牛嘅保育工作。同爪哇野牛嘅情況相反,拉祜族村嘅村民受傳統信仰影響唔會獵殺野牛,所以團隊今次嘅工作主要喺避免野牛破壞村民嘅農作物,發生人牛衝突。


同村民進行訪問

保育團隊訪問咗當地嘅村民,了解完佢哋對野牛嘅睇法後,分別喺當地設立咗宣傳教育牌、一些不能被發展嘅社區保護地,以及一隊印度野牛監察隊,減低發生人牛衝突嘅機會。即使由保育團隊喺開始工作不久後就受疫情影響,未能再次返回當地視察,但當地嘅保育工作仍在進行中,而情況亦相對樂觀。


設於路邊嘅宣傳教育牌

印度野牛監察隊嘅監察工作


圖片來源:嘉道理農場