小朋友揀飲擇食,唔食呢樣又唔食嗰樣,相信係令唔少家長頭痛嘅問題。江蘇常州市一位媽媽劉利,為咗令囝囝磊磊乖乖食早餐,自2017年起幾乎每日都會炮製「詩詞」早餐,最後唔單止令磊磊鐘意咗食早餐,更培養咗佢嘅寫作能力,屢屢喺詩詞比賽中獲獎。劉利仲話,為咗令自己嘅「作品」再上一層樓,佢已經報咗國畫班,更定下做滿1000份早餐嘅目標。

劉利表示,磊磊朝頭早唔多鐘意食嘢,為咗等佢可以按時食早餐,自己都諗咗好多方法。直至佢發現磊磊鐘意睇一個叫做《中國詩詞大會》嘅電視節目,於是佢靈光一閃,想以詩作畫嘅方式做早餐,嘗試將詩詞融入早餐之中。為咗令磊磊6點有早餐食,劉利每日朝早4時半就起身整早餐,亦要不斷上網搵詩詞資料。經過劉利4年嘅努力,磊磊宜家已經係個詩詞達人,寫作特別優秀。劉利至今已成功製作出498份似模似樣嘅作品,仲報名學國畫,提升自己嘅繪畫基本功。

網民見到劉利製作嘅早餐後,紛紛表示唔忍心食:「這能吃嗎?是作品吧」、「看上去好吸引,但不忍心吃下肚,矛盾」。亦有網民自嘲,如果當初自己媽媽都咁樣準備早餐,話唔定自己都可以啟發到寫作天賦。

圖:中新網