早前，政府決定復辦全港15個地點嘅年宵花市，開放至年三十晚。而疫情下，年宵市集或花市都要遵守人流管制措施，熱鬧程度一定有別於以往。

本地臨時裝飾製作公司BUNC Decorative Production就參照咗往年維園年宵，設計網上3D虛擬年宵市場 BUNC V Market，希望市民能夠喺疫情下「零風險」感受農曆新年下，維園年宵市場嘅熱鬧氣氛。

為增加市民行虛擬年宵嘅真實感，BUNC Decorative Production設計團隊為年宵設計咗唔同嘅維園年宵裝飾；另外BUNC V Market增設牛年裝飾牆，又收集拜年時最怕親戚問嘅尷尬問題。有市民留言「幾時結婚」、「人工幾多」、「拍拖未呀」等字句。 

BUNC V Market有唔同類型嘅店舖，包括花店、寵物用品店、手作小店同水果店。如果用家有意喺虛擬年宵中購物，可以按每間店舖旁嘅Whatsapp，Instagram或Facebook按鈕，同店主溝通，進行交易。

BUNC Decorative Production只係作為平台提供者，而不參與當中嘅買賣過程。平台籌募初始，一共有 40 多間店舖申請BUNC V Market虛擬攤位，該平台從中篩選出20多間本地小店，並以 800元一個月嘅租金租借攤位，讓每間店舖展出商品。

有興趣可以到「BUNC V Market虛擬年宵」網址瀏覽︰    https://livetour.istaging.com/4a894cb6-eb46-4676-9860-e662005d3deb

圖︰網站截取

年宵市集門口。

牛年裝飾牆。

有20多間小店進駐。

年宵裝飾設計擺設。

虛擬網站中設計埋維園附近建築物，增加真實感。

合共參與其中4個活動，就可以參加抽獎。