聽日就係年初一啦！過年最開心莫過於收利是，派利是亦係傳統習俗之一。

香港研究協會喺本月1日至8日期間，成功訪問到1,044名15歲或以上市民，以了解市民對利是錢及新年消費嘅意見，協會喺2月9日發布調查結果，結果顯示，超過一半市民減新春消費；37%市民減派利是預算，兩者比例都創咗16年以來新高。

問及今年農曆新年消費預算，51%受訪者表示會較去年「減少」，比例創16年新高；表示消費同去年「差不多」嘅佔31%；而表示消費會「增加」僅佔12%；「未決定」及「無意見」則合共佔7%。

調查亦發現有62%受訪者表示會「減少」旅遊及娛樂開支，亦有54%受訪者表示消遣開支都會減少。結果顯示，今年農曆新年多數市民消費意欲疲弱，對旅遊業、娛樂及康樂服務業難免會造成打擊。

至於問及派利是金額預算，有37%受訪者預計今年「派利是」金額會較去年「減少」，比例同樣創16年新高；表示金額同往年「差不多」嘅受訪者佔46%；表示金額有所「增加」嘅受訪者僅佔13%，而「無意見」則佔5%。 

對於會唔會用電子錢包派利是，有86%會「派利是」嘅受訪者表示「一定不會」和「多數不會」，表示「一定會」同「多數會」僅佔7%，結果顯示電子利是喺本港未普及。 

圖︰Unsplash@Alana Harris