為幫助青少年在囚人士重建正確嘅價值觀、重返人生正軌,早前懲教署同警務處共同合作開展「並肩同行」計劃,懲教人員同警隊義工會根據在囚青少年嘅個人成長、心靈需要同家庭發展籌劃唔同類型嘅活動,提供一系列活動同支援在囚青少年。趁住農曆新年將至,懲教人員同警隊義工日前化身「甜品師」,去壁屋懲教所同一班青少年在囚人士一齊搓湯圓,之後更充當「愛心速遞員」走訪多個地區,代在囚人士將熱辣辣嘅湯圓連同親手寫嘅心意卡即日送到佢哋屋企人手上,傳遞節日問候。

阿成因干犯同毒品相關嘅罪行入獄,義工林昭瓊將阿成做嘅湯圓送到佢媽媽手上嗰陣,媽媽未吃已經眼紅,並對阿成無放棄自己,有自己方向而感到安慰,更形容呢個係「有錢也買不到(的喜悅)。」

除咗將在囚人士親手做嘅湯圓送到佢哋屋企人手上之外,義工更即場播放在囚人士預先錄製嘅真情對話片段,等屋企人可以感受到佢哋嘅心意。義工之後仲特別為家人拍攝片段,喺新年期間為在囚人士送上祝福同關懷。

圖:FB@香港懲教署 Hong Kong Correctional Services