早前九巴就喺饒宗頤文化館開設咗一間年宵限定店,喺農曆新年大搞新意思。不過近日有網民發現店內除咗各種九巴嘅模型同精品外,竟然仲有1比1嘅巴士凳賣,而該網民更加笑指:「九巴想市民返到屋企都感受塞車嘅感覺?」。


據了解,相片中嘅巴士凳售價為 900 港元,而且右邊嗰款喺非賣品,只有左邊嘅滑輪款式可供購買。而呢張巴士凳曝光後亦引嚟唔少網民熱議,佢哋更紛紛留言笑道:「成日搭巴士都冇位坐,自己買張櫈返屋企就可以慢慢坐」、「wfh都要記住九巴塞車嘅感受」、「仲有埋個手柄...」。


其實除咗呢啲咁有趣嘅貨品外,九巴嘅期間限定店仲有不同嘅展品比大家打卡,例如:舊巴士站牌、車票、錢箱、三劃黃丹拿A木頭巴士及巴士膠牌等。而饒宗頤文化館嘅「犇墟」更加有唔少年宵攤檔,有興趣嘅讀者都不妨過去行吓。


圖片來源:Facebook@PLAY HARD 玩硬