香港沙灘排球運動員劉梓浩喺2018年亞運因病被逼退賽,喺接受檢驗後發現確診血癌,翌年2月佢獲家姐捐出骨髓一度康復。然而,佢體內嘅癌細胞喺上年6月再度復發,要入院接受治療。由於接受新療法費用昂貴,加上因為新冠肺炎疫情,劉梓浩未能繼續其教練工作,積蓄所餘無幾嘅佢發起眾籌求援。本來60萬醫藥費嘅眾籌目標,喺香港各界熱烈支持下,短短一日已籌到250萬。尋日劉梓浩更喺社交平台宣佈佢已經康復,話自己將「會喺牛年精精神神回歸大家眼前」,仲提前同大家拜個早年添。

劉梓浩喺佢同拍檔王沛林嘅Facebook專頁「LAU Tsz Ho/WONG Pui Lam - Hong Kong Beach Volleyball Team」發文公佈自己康復嘅好消息,仲多謝大家嘅愛心同慷慨捐助,令佢可以接受新療法治療,而新療法效果亦理想。雖然佢宜家仍要覆診,更因身體免疫力欠佳,大部分時間都要留喺屋企以免受到感染,但佢就預告自己牛年會精神回歸大家眼前。

圖:FB@ LAU Tsz Ho/WONG Pui Lam - Hong Kong Beach Volleyball Team