握手、擁抱呢啲以往好簡單就可以做到嘅事,喺新冠肺炎全球肆虐下都變得艱難,尤其係對於抵抗力較差嘅長者或長期病患嚟講,一個擁抱都足以致命。世界多國近日興起「擁抱帳篷」(Hug Tent),等老弱病者可以通過透明帳幕,同親友隔住膠帳幕共聚。

疫情底下,為咗防止感染新冠肺炎,大家都要保持社交距離,而長期病患同老人家由於免疫力比較差,要被迫過住與世隔絕嘅孤獨日子,想見下親人朋友都要隔住個mon。而最近喺美國、巴西、英國等地流行嘅「擁抱帳篷」,就允許佢哋喺安全嘅環境下同親朋好友相聚,雖然要隔住個帳幕,但就滿足咗人與人之間嘅肢體接觸需求。呢種擁抱帳篷,一般用透明膠袋製成,上面仲有封閉式膠手袖,可容許帳幕雙方握手、相擁。

美國科羅拉多州75歲婦人Lynda Hartman,喺院舍設置嘅擁抱帳篷內,終於可以同患有阿茲海默症嘅77歲丈夫Len再次擁抱同牽手。Lynda表示已經至少8個月無同丈夫相擁,即使雙方之間隔着帳幕,對佢來講仍然意義重大。

圖:中新網