新冠肺炎影響全球數十億人嘅生計,往年未到農曆新年,各地華人聚居處已經好熱鬧,舞龍舞獅更加係過年必備節目。可惜今年受疫情影響,澳洲有龍獅隊至今仍未接到表演訂單,但佢哋仍然積極認真練習,希望可以繼續上演呢種傳統過年活動。

澳洲今年嘅賀年慶祝活動唔係取消,就係縮細規模,而多個醒獅團稱今年嘅訂單比往年少6至7成,維多利亞省其中一支最大舞龍隊、墨爾本中華青年會舞龍隊隊長詹智皓更表示,佢哋今年仲未接到表演訂單。此外,喺限聚令下,唔少龍獅隊無法招收新成員,以致青黃不接,同時亦令團隊缺少一齊練習嘅機會。雖然訂單情況唔樂觀,但好多醒獅團仍然對新一年充滿憧憬,隊員會喺屋企鍛煉體能,或者透過視像通話一齊練習舞獅舞龍技巧,有啲團隊就分小隊形式訓練,期望有機會表演嗰陣可以施展渾身解數,做到最好。

圖:新華網