距農曆新年唔夠一個禮拜，但今年新春大概未有往常熱鬧。而各行各業喺過去一年都受到疫情唔同程度嘅衝擊，有人甚至要流落街頭。社企「銀杏館」近日又再次出動，喺新年前親身落區，為一班有需要人士送上賀年食品同抗疫物資，希望佢地亦可以感受到節日氣氛。

「銀杏館」（2月6日）喺Facebook專頁表示，基層喺過去一年係最受打擊嘅一群。除咗三餐不繼，亦有人因為無工開，無法交租而要「瞓街」，無奈喺迫在眉睫之中作出最壞打算。農曆年前，幾位熱心義工不懼疫情，拎住大袋「愛心行動喜迎春」賀年物資，包括角仔、笑口棗及口罩，喺油尖旺區內慰問弱勢社群，部份人喺疫情下都對露宿者退避三舍時，義工選擇靠得更近並送上祝福。

「銀杏館」指，過去一年，來申領「福飯」嘅人數不斷增加，當中包括唔少露宿者，有啲較幸運後來搵到工開；有啲搵到中途宿舍暫住，但仍然有唔少繼續流落街頭。有人問「不斷派飯、派物資，真的能幫到這群基層嗎？」，「銀杏館」表示，一份真摯嘅關心與鼓勵，是讓活喺艱苦中嘅人感受到，社會上係有人真心著意咁關心他／她。又表示，「命運不能頃刻改變，但誰又可料未來命運不可改變？」 

不少網民睇到呢個貼文都表示感謝義工嘅付出，又有網民留言「去到山窮水盡，一碗飯，一份關心，幫到」，令人為之暖心。

圖︰FB@銀杏館