新冠疫情肆虐,大家都視離島為避世之地,令到本來悠閒嘅社區都變得熱鬧!不過好多人遊離島,都只係掛住食買玩,咁嚟到坪洲可能會失望,因為呢度名副其實係個「小」島,亦無乜特別嘅玩樂地方,但對呢度嘅人嚟講,坪洲其實細得剛剛好!

愛心商戶助長者

坪洲街坊陳俊傑,係藝術家兼策展人,去年創辦咗一本有關離島嘅雜誌《ISLANDERS 島民》。佢喺2014年就搬到坪洲居住,來到後亦覺得坪洲嘅環境好符合自己嘅想像:「呢度鄰里關係好緊密,又靜靜地,唔會有太多旅客。」

坪洲好細,但陳俊傑最喜歡嘅正係坪洲夠細:「我住落就發現呢度細得啱啱好,住喺呢度56年後,個個都認得你,呢個係多於一般鄰里嘅關係。」

坪洲長者暨青少年鄰舍中心喺坪洲推出近兩年嘅社區投資共享基金計劃「坪洲樂齡會」,一直致力喺呢度建立社區網絡,提倡跨代共融,計劃主管譚健忠亦表示,坪洲好細,人口唔算多,但人情味好濃厚,人與人之間有守望相助精神,佢舉例指:「我哋推出「坪洲愛心商戶」,就有17間商戶參加,大家不但會幫手宣傳中心服務,店主亦會幫手協助長者,例如去年派發口罩時,有部分長者唔識字,商戶主動講解俾佢哋聽,甚至幫佢哋登記。」原來坪洲嘅商戶大部分都係小店,都係由老闆自己打理,同左鄰右里見咗好多年,所以好重視鄰居關係:「有時老人家重覆去購物,佢哋估到佢有認知障礙,就會轉介俾中心。」

遊客增加造成困擾

不過,正因為坪洲比較寧靜悠閒,陳俊傑覺得街坊唔太想特別多做生意,亦唔想有太多遊客嚟坪洲:「早前我哋籌辦『船到橋頭生活節』嘅時候,佢哋都有啲疑慮。」

譚健忠亦認同島民可能對遊客有戒心:「疫情間多咗好多人嚟坪洲,市民連搵位食飯都好難,惟有希望旅客注重個人衛生,減少對居民嘅困擾。」

長者擔任導賞員

坪洲仲有另一個情況,就係長者較多,譚健忠指:「坪洲有1/4係長者,高過全港平均數,因為年輕人嫌返工唔方便,好多家庭都剩低長者留喺度。」而且好多長者都需要支援:「有啲長者住喺偏遠地區,現時中心有安排義工定期去探訪佢哋,同時亦鼓勵左鄰右里嘅街坊多啲去關心長者。」 為咗令長者生活更充實,早前佢哋就培訓長者擔任導賞員,希望長者可以將坪洲傳統文化同歷史傳承落去:「他們見證坪洲多年變遷,由他們講解比較第一身! 其實這些長者好多以前都係公務員或從事文職,吸收能力都幾強。 之前佢哋就做出一個創舉,得悉參加導賞團嘅係聽障人士,長者就好用心咁,親自用電腦製成小冊子,用相片及文字幫助講解坪洲嘅名勝古蹟。」

重新認識昔日工業重鎮

喺疫情爆發之前,佢哋曾經舉辦過多次導賞團,帶大家暢遊奉禁封船碑同灰窰廠遺址等景點!「其實坪洲以前係工業重鎮,例如大中國火柴廠,牛皮廠等都好特別,一直到上世紀70年代,工業先至逐漸式,而大中國火柴廠亦都喺70年代結業。」

另外,坪洲仲有一塊好有歷史嘅「奉禁封船碑」,譚健忠解釋:「清朝多海盜,官兵經常借用漁船對付海盜,影響漁民生計,所以向政府要求不再借用,其後官府便頒令禁止,立咗呢塊石碑。」

其實坪洲嘅歷史文化豐富,希望疫情過後,長者可以將呢度嘅歷史故事,繼續傳承俾香港人!

圖片來源:坪洲樂齡會、船到橋頭生活節


坪洲名副其實係個「小」島,但對呢度嘅人嚟講,坪洲其實細得剛剛好!


「坪洲樂齡會」早前推出坪洲愛心商戶,有17間商戶參加。

坪洲共享櫈,讓街坊自取自用,自管自理,充分體現坪洲人鄰里關係。


坪洲樂齡會經常探訪長者,致力建立社區網絡。


坪洲曾是工業重鎮,但大中國火柴廠已經結業,只留下一塊紀念碑。


坪洲大利島昔日有灰窰廠,後來香港引入英泥,灰窰廠便開始式微。

坪洲島上有一塊「奉禁封船碑」,亦好有歷史價值。


坪洲充滿寧靜悠閒嘅氣息。


由長者充滿導賞員,帶大家認識坪洲嘅歷史。