正所謂遠親不如近鄰,內地四川彭州市男子姜運崇見到鄰居屋企火燭,義不容辭咁衝入去救起被困嘅78歲王伯伯。姜運崇嘅手臂亦因此留低傷疤,但佢表示就算再揀一次,佢都係會衝入去救人。

上個月中大概傍晚時分,姜運崇同平時一樣去附近超市幫小孫女買零食,忽然聽到周圍有人呼叫失火。佢即刻趕到失火地點同其他居民一齊潑水救火。姜運崇一邊救火一邊大聲問入面有無人,

幾聲呼喚後,佢聽到屋入面傳來微弱嘅呼救聲。眼見形勢危急,姜運崇亦唔顧得咁多,除咗外套衝入火場,喺濃煙入面搵到鄰居王伯伯。王伯伯蜷縮喺角落,臉、手、腳已被嚴重燒傷,奄奄一息。姜運崇一把抱起王伯伯衝出火場,同趕來嘅救護車一齊護送王伯伯到醫院搶救。

所幸王伯伯經過治療後已無大礙,宜家喺一間養老院養傷。姜運崇去探佢嘅時候,王伯伯仲拉住佢隻手不停落淚:「運崇啊,如果不是你,我早就沒了。」姜運崇後來受訪表示,當時又跌瓦片又大火,加上自己成身都濕曬好有可能觸電,真係諗起都驚:「但如果再來一次,我還是會沖進去,沒有什麼比救命更重要。」

圖:新浪