可能好多人覺得領養動物係我哋救咗佢哋,但動物都有靈性,喺危難關頭動物分分鐘救我哋一命。美國新澤西州一個男子Brian Myers最近啱啱領養咗一隻6歲嘅德國牧羊犬Sadie,之後Brian喺屋企突然中風發作,多得Sadie幫佢保持清醒,更將Brian拖到手機附近,等佢可以順利打電話求救,最後成功救返Brian一命。

動物收容所Ramapo-Bergen Animal Refuge近來喺社交平台分享呢個故事,Sadie幾個月前被Brian領養,早前Brian因為中風倒地時,Sadie一直無離開,不斷舔Brian塊面等佢保持清醒,甚至仲拖Brian去電話旁邊,等佢可以打電話求救。收容所表示,Sadie原本特別驚男性,但就可以同Brian好快建立起感情,「Sadie是Brian能夠活下來的唯一原因,這次換薩迪給布萊恩第二次生命的機會。」

Brian之後受訪表示,當時佢啱啱瞓醒想話去廁所,點知一離開床就跌倒喺地上,成個人企唔到起身,好彩Sadie及時察覺趕到佢身邊,「我只是抱牠,Sadie就開始拖著我,所以我勉強可以在地板上移動,不然我還是會繼續躺在原地。」佢更感嘆自己無耐前將Sadie喺收容所入面救出來,但如今獲救嘅人竟然係自己。Brian宜家仍然喺醫院接受治療,但就每日都會同Sadie視像通話。

圖:FB@Ramapo-Bergen Animal Refuge