就嚟過新年,唔少人都會買返一兩盆年花(尤其係桃花)擺喺屋企應節,不過當年花凋謝大家又會點處理?不妨將要棄置嘅年花拎去回收喇!為鼓勵社會各界回收及循環再造園林棄置物,環境保護署呼籲市民及工商機構透過桃花回收計劃,回收春節後擬棄置嘅桃花。由2月20號(星期六)至27號(星期六)期間,大家可以將桃花拎去屯門環保園個中央收集站同52個地區收集站回收,參與回收嘅市民仲可以獲發電子證書同埋小禮物乙份添。

環保署發言人表示,今年地區收集站嘅數目由舊年嘅43個增加至52個,合適嘅桃花同其他園林棄置物會被轉化成更多唔同種類嘅有用物料,例如園藝、種植用嘅堆肥同覆蓋物、木板及木方等,方便重用、循環再造或被升級再造成裝飾、木製藝術品等。

不過是次計劃只限回收桃花,市民回收前要拆除揮春、膠帶等裝飾物,以免影響回收再造嘅過程。環保署亦鼓勵市民將其他小型植物(如年桔)重新栽種,至於賀年裝飾物就可以貯存再用,惜物減廢。有關桃花回收計劃的詳細資料,可瀏覽:www.wastereduction.gov.hk/tc/Peach_Blossom_Trees_Recycling_Programme_2021.htm

圖:環保署網頁