近來愈發多人關注保育，尤其充滿神秘色彩嘅舊建築令人為之神往。

九龍建業（0034）日前向城規會申請，喺牛池灣前聖若瑟安老院地盤興建5幢住宅，一共5005伙。同時，亦令大眾重新關注擁有百年歷史建築前聖若瑟安老院現況。 

呢座歷史悠久嘅建築，由孫眉農場到小梅村，由富商莊園到聖若瑟安老院，最終或難逃清拆命運。近日有Facebook專頁「香港隅地 HK Corners」介紹前聖若瑟安老院，令內部獨特設計曝光。 

該專頁去年4月已介紹過安老院，並拍攝超過百張照片，又配文解說建築結構及建築背後所埋藏嘅歷史，令人重新認識呢幢充滿歷史風采嘅建築，當中歷史更令人肅然起敬。聖約瑟安老院1920年代由法國慈善機構安貧小姊妹會建立，其中前聖約瑟安老院別墅、門樓及宿舍A，喺2010年2月獲評級為二級歷史建築。 

別墅屬於前聖若瑟安老院歷史建築群嘅核心部份，原屬富商陳賡虞（又名陳賡如）所有，建於1919年，屬於單層建築，設計受新古典主義及英國殖民地嘅建築風格影響。據長春社研究指出，別墅前身原為清末革命黨同盟會成員陳少白所有，喺1908年購入，並租予孫中山兄長孫眉，作為農場以及同盟會嘅革命基地。

根據發展商最新向城規會提交嘅方案，是次申建為5幢樓高58至59層高住宅，另連4層平台，提供5005伙，較06年批出嘅舊發展方案提供2120伙，多建達2885伙，伙數增加1.3倍。

地盤位於清水灣道35號，佔地約24萬方呎，現為「綜合發展區」地帶，並採地積比率7.5倍發展，總樓面超過180萬方呎。項目非住宅樓面涉約22萬方呎，提供零售、食肆、幼稚園及安老院等設施。 

重建方案設計透過階梯式綜合建築物嘅半月型設計，以及同公眾休憩用地作融合，「使三座歷史建築成為發展的核心」，供所有人享用及欣賞。但九建一直未能就補地價同政府達成協議，令項目多年來尚未動工發展。 

大家如欲瞭解前聖若瑟安老院嘅演變歷史，可以前往Facebook專頁「香港隅地 HK Corners」細看。

圖及資料來源︰Facebook@香港隅地 HK Corners

建於1930年前後，為宿舍樓，比利時建築師（Van Wylick）作品。

主樓梯色彩為暖色調，相信係服侍長者嘅關係而採用圓角設計。

呢座左右對稱格局嘅別墅係建築群嘅核心部份。建於一九一九年之前。

圖中顯示前聖若瑟安老院建築群三座建築，左邊為一層高別墅，右邊為宿舍樓同下方門樓都係建於1930年代。