一直以推動長者就業、定期免費派飯俾有需要人士嘅本地社企銀杏館,繼上年聖誕節召募一班長者製作可愛聖誕吊飾,等佢哋可以賺取有尊嚴嘅收入之後,今年農曆新年前,銀杏館再延續長者手工小組,推出長者自家手工製新產品「御守祝福符」,幫助長者賺返啲生活開支過個好年。

銀杏館幾日前喺社交平台發文分享,今次手工小組會沿用一班縫紉長者班底,同時加入多位有急切工作需要嘅新成員。就好似70歲嘅「王阿姨」咁,原本喺茶餐廳做清潔工,不過受新冠肺炎疫情影響,茶餐廳生意不足,王阿姨被裁員,佢嘅子女亦同樣面臨失業。所以王阿姨加入手工小組,正可幫佢賺取一啲重要收入。除咗一班縫紉婆婆高手之外,今次仲有男士組員加入。仁叔(化名)就係其中之一,佢原本喺國內教書,疫情令佢無辦法返內地繼續工作。村叔(化名)原本係餐廳魚生師傅,失業後山窮水盡曾淪落為露宿者。佢哋去銀杏館申領「福飯」求助,之後獲社工安排加入小組。

銀杏館表示,最新失業率大幅飆升,基層市民首當其衝,希望今次嘅「御守祝福符」能夠帶俾大家正能量,亦帶俾一班基層中嘅基層多一點愛。所有組員透過手工藝賺取一啲收入嚟幫補生活開支,而最難得嘅係佢哋從過程中重拾對生命嘅投入,搵到一點光。

圖:FB@銀杏館