新冠肺炎肆虐,為咗減少前線人員感染病毒嘅風險,澳門大學科技學院教授徐青松帶領研究團隊研發出消毒智慧型機器人——消毒智多星,代替防疫人員深入疫情嚴重嘅地方,消毒、清潔空氣同物件表面嘅細菌病毒。呢款機器人宜家已經喺澳門嘅醫院、政府辦公場所、圖書館等地方應用。

消毒智多星約一米高,重25kg,叉滿電可以用三至五個鐘,佢具備自主定位導航,可以多機協作、智慧避障同360度全方位消毒。佢仲可以使用超乾霧化多種消毒液,通過高速氣流將霧化後嘅消毒液彌散到消毒區域。喺測試過程中,只需要15分鐘就可以消毒100平方米嘅空間,消毒殺菌效果達到99%。

徐青松同佢嘅團隊喺舊年4月開始研發消毒智慧型機器人,由零件、程式、各個模組、外觀設計乃至組裝都由團隊自主研發,將成本控制得較低,宜家每台消毒智多星嘅成本約為25000至35000澳門幣,比市面上具備類似功能嘅機器人平咗差唔多10倍。徐青松表示,用家可根據自身需要,選擇使用手柄指揮機器人,或預先通過電腦為機器人規劃消毒路線。佢亦希望消毒智多星嘅科研技術未來可以應用到社會,實現科研成果產業化,造福社群。

圖:澳門大學