新冠肺炎全球肆虐,影響咗全世界人嘅工作同生活,好多人因此遭遇種種困難,容易有輕生嘅念頭。喺呢個時候,如果有人肯伸出援手,甚至俾多小小關顧,就隨時可以救返一個人。南韓有個失業嘅網民上網訂咗個pizza,備註話呢餐係佢最後一餐,點知pizza店老闆見到備註,唔單止主動打電話關心網民,仲親自送pizza上門,見到網民無事先放心離開。

據韓國媒體報道,有網民發文表示,自己求職不斷失敗,眼見青春即將流逝,就抱住最後嘅決心申請去海外進修語言,點知就撞正新冠肺炎被迫取消行程,佢覺得好鬱悶,甚至想輕生。呢位網民用外賣APP喺經常幫襯開嘅pizza店點餐並備註:「這是我最後的一餐,我會把我的好運也一併送您。」網民啱啱落訂,pizza店老闆就即刻打電話問佢:「沒事吧?有需要幫你叫救護車嗎?」網民瞬間感動落淚。之後老闆更親自上門送pizza俾網民,見到佢安然無恙先放心離去。 

網民打開pizza發現,老闆喺pizza盒上寫住:「一切都還好吧?看到留言的話,請一定要寫下回饋讓我們知道,未來只會有好事發生,忘掉過去的不愉快吧!」就係呢個暖心舉動,令網民放棄輕生念頭,然後喺網上分享呢個經歷。

好多網友紛紛留言支持:「我看完都哭了」、「這世界還是值得活下去的」、「披薩店一定要生意興隆」。對此,pizza店老闆亦親自發聲表示,2020年對大家嚟講都係相當辛苦嘅一年,自己並唔係因為年紀稍長而想說教,只係希望共同生活喺呢個世代嘅所有人,今年可以過得更加幸福,大家一起加油。

圖:網上圖片