芬蘭摺紙藝術家 Juho Könkkölä 近日喺唔剪紙嘅情況下,成功用一張紙摺出一個日本武士。而呢一件單喺摺紙過程就用咗逾50幾個鐘,構思更用咗數個月去完成嘅作品更加係十級分精細,實在令人嘆為觀止。


呢個日本武士僅由一張 68cm X 68cm 嘅極薄溫州皮紙摺成。由於唔可以剪紙同撕破紙張,所以 Juho 只可以靠精心設計嘅褶痕去完成作品,而過程中更需要用到水同金屬夾將紙固定。


即使你唔識摺紙,你都可以想像到製作呢隻日本武士需要克服幾多技術上嘅困難,但有趣嘅係 Juho 坦言自己同好多人一樣,發現事情過於復雜難以完成嘅時候,都會因為感到挫敗而想放棄,所以今次嘅困難其實在於失敗無數次後,都自律地練習,繼續嘗試完成新作品。


圖片來源:Instagram@jkonkkola_origami