遺體器官捐贈唔單止可以幫助有需要嘅人,亦係延續生命嘅善舉,但仍然有好多人擔心離世之後,捐曬啲器官出來會令遺體唔完整。台灣有醫院嘅移植團隊,就利用「3D打印器官」來填補捐贈者已經捐出嘅器官,等捐贈者可以「完整地走」之餘,亦可以撫慰家屬嘅心靈。

台灣ICU醫生陳志金喺社交媒體發文指,器官捐贈者嘅家屬經過「天人交戰」後先決定替親人捐出器官,但總會有人覺得「器官被取走了」,身體就會「空空的」,從而有咗遺憾。為此,較早前醫院嘅移植團隊已經用器官嘅「彩色圖卡」嚟填補器官嘅空位,令家屬覺得貼心。而隨住近年3D打印技術逐漸普及,團隊就諗到可以用「3D打印技術」印一個器官出嚟填補已經捐出嘅器官,等家屬可以安心。呢啲打印出嚟嘅器官用咗可以自行分解嘅玉米粉環保材質,而嬰兒或小朋友嘅器官,團隊都會依其器官嘅實際大小訂製,既貼心又環保。陳醫生仲話:「為了安慰器官捐贈者的家屬,我們總是能夠多一點溫暖~」

唔少網民大讚醫院嘅貼心安排,亦可以令自己同家屬更加支持捐贈器官。

圖:FB@Icu醫生陳志金