柏金遜病係長者常見嘅神經系統疾病,大部分患有柏金遜病嘅長者屬於原發性,主要係由於腦內部分神經系統功能受損而引發,其明確成因宜家亦暫時未有醫學實證。香港中文大學生命科學學院陳文博教授同李明名博士共同領導嘅研究團隊,最近研發咗一種新型多肽抑制劑,可以針對一種會破壞神經系統嘅蛋白聚集體,抑制其喺腦部累積,或有助緩減多種神經退行性疾病,包括柏金遜病及路易氏體失智症嘅病情。

近年有研究發現,柏金遜病患者同部分失智症患者嘅大腦神經細胞入面,存在大量α-突觸核蛋白,佢哋積聚起來成為一啲細小球狀組織,呢啲蛋白聚集物有神經毒性,會破壞神經細胞,導致認知、運動功能衰退。

2015年,研究團隊意外發現一種特定嘅SUMO1蛋白變種體可以有效抑制α-突觸核蛋白喺腦神經積聚。研究團隊之後花咗五年時間,鑒定出SUMO1蛋白中嘅SUMO1(15-55)可以同α-突觸核蛋白結合,直接阻止其積聚。其後,團隊同中大生命科學學院蔡永業腦神經科學中心陳浩然教授合作,測試SUMO1(15-55) 對於有柏金遜病果蠅模型嘅神經保護作用。實驗結果顯示,果蠅喺幼蟲期被注入SUMO1(15-55) 治療後,減緩咗成蟲嘅神經退行性疾病嘅相關症狀。研究結果顯示,呢種多肽抑制劑喺治療柏金遜病方面有重大潛力,期望日後可供臨床應用,改善患者病情。

圖:CUHK