房屋問題喺本港一直被人詬病，唔少港人居住環境未如理想。

九龍樂善堂前年獲關愛基金撥款資助下，開展宋皇臺道及土瓜灣道交界組合屋項目，預計今年3月竣工，第二季可以陸續入伙。樂善堂昨日（27日）表示，相關項目能夠提供110個過渡性社會房屋單位，主要係2人單位，估計至少220人受惠，項目即日起接受申請，3月15日截止，租期不短於兩年。

另外，基本申請條件係輪候公屋3年或以上，居住環境惡劣等家庭，如果家庭成員有18歲或以下兒童可優先。至於租金標準方面，綜援家庭為租金津貼上限；低收入家庭就會參考綜援租金津貼，合資格家庭經審查後亦可以獲發津貼。

樂善堂總幹事劉愛詩表示，預料今次社會房屋申請會比以往踴躍，今次項目除咗為基層提供安樂蝸之外，項目仲設有共享休憩空間，定期舉辦家庭活動，並對外開放，希望可以促進社區共融。機構仲會提供膳食、醫療、就業及家庭輔導支援，協助受疫情影響嘅家庭。

今次項目樓高3層，採用組裝合成建築法興建，能夠提供110個單位，每個單位面積大約180平方呎，設有獨立洗手間及浴室，以及獨立廚房連廚櫃。地下亦設有2個無障礙單位，面積大約240平方呎。項目建築以環保及綠化為主題，綠化空間佔整體建築面積20%，又有保留大樹並建立綠化花圃區。

資料及圖片來源︰九龍樂善堂

申請資格等詳情。

項目嘅地理位置位於宋皇臺道及土瓜灣道交界。

項目運用咗組裝合成建築法興建。