喺新冠肺炎疫情下,好多演唱會要被逼取消或延期,美國搖滾樂團The Flaming Lips近日就成功喺美國舉行演唱會!原來佢哋採用一種特別嘅「隔離」方法,無論樂手、歌迷都匿埋喺一個「太空泡泡」入面,咁就安全得多喇~ 

「太空泡泡」嘅諗法來自樂團主唱Wayne Coyne,其實喺The Flaming Lips之前嘅演出入面,佢就經常用呢類型道具同fans同樂,Wayne Coyne更強調喺泡泡入面聽演唱會甚至「比去雜貨店還安全」。

每個「太空泡泡」入面都有一個高頻輔助揚聲器,有助預防表演音量減弱,仲附上一個水樽、一個電池供電嘅風扇、一條毛巾同埋「我要去小便/我好熱」嘅標語。如果喺泡泡入面覺得太熱,可以利用吹葉機為泡泡重新填滿冷空氣,至於需要去廁所嘅歌迷就要先戴返口罩,舉起「我要去小便」標語就可以由工作人員陪同踏出泡泡並前往洗手間。而每場演唱會可容納100顆「太空泡泡」,每個泡泡最多可容納3人,Wayne Coyne指「太空泡泡」入面有足夠氧氣夠3個人喺入面度過70分鐘。佢更指出:「我認為這是新常態,您可以選擇是否去看現場演出,但我認為我們能解決這個問題。」

圖:YouTube@The Late Show with Stephen Colbert,Twitter@NathanPoppe,FB@ Flaming Lips