受新冠疫情影響,美國明尼蘇達州一個劇院嘅生意大受影響,但劇院嘅藝術總監為唔想劇院倒閉,近日竟然喺劇院外嘅停車場設計咗一個「冰迷宮」,務求以另一個方式為大眾提供娛樂,去賺錢維持劇院嘅營運。


呢個名為 Ice Palace Maze 嘅「冰迷宮」其實係藝術總監 Calyssa Hall 同父親兩人嘅主意,事關劇院早前因為天氣寒冷而被迫暫停剩低嘅戶外表演。而為咗可以喺今個冬天賺到錢,出糧比一班員工, Calyssa 同父親就參考咗世界各地嘅「冰迷宮」,並設計咗呢座 Ice Palace Maze。


Ice Palace Maze 長34米,闊22米,用咗超過1,500塊重350磅嘅冰去建成,相信將會係今年全美國最大嘅「冰迷宮」。迷宮嘅票價為15美元(約港幣$116),而4歲以下嘅小朋友,以及100歲以上嘅長者則可免費入場。


圖片來源:Instagram@stillwaterzephyrtheatre