近日台灣各大超級市場出現咗一款名為「失戀回魂湯」嘅香蕉排骨湯湯包。呢款湯包不但以「都市傳說推薦」作招徠,更指「失戀要喝,單戀更要喝!」。雖然唔知呢個湯包點樣可以幫助到失戀嘅人,但單係香蕉加排骨呢個配搭已經嚇怕唔少網民。


原來呢款湯包由係高雄市農產局為咗解決香蕉過剩問題,而同當地飲食業共同研發嘅。由於台灣一直流傳「失戀的人要吃香蕉皮」嘅講法,並指香蕉皮能幫助減少失眠同憂鬱,所以當局就索性將呢款香蕉排骨湯命名為「失戀回魂湯」,希望可以引起關注。

有網民喺 Facebook 分享試後感,指「很正常的排骨湯,沒什麼怪味,但也說不上好吃,只是取了很有噱頭的名稱。」

不過根據台灣食品科學技術學會講法,原來未成熟嘅綠色香蕉皮含有色胺酸,的確可以起到穩定情緒嘅作用。所以如果大家有朋友失戀嘅話,不妨向佢推薦呢款連蕉皮一齊煮嘅「失戀回魂湯」,幫助佢渡過難關。


圖片來源:網上圖片