城市不斷改變,好多舊社區都面臨翻天覆地嘅改變,其一個例子就係土瓜灣。2016年6月,市區重建局正式刊憲公佈土瓜灣鴻福街、銀漢街、啟明街和榮光街嘅重建項目及發展計劃,事隔四年,重建區內大部份居民終於得到安頓,而重建項目亦即將進入工程部份。聖雅各福群會社工隊最近將重建戶嘅心聲、過去4年同街坊接觸及社區生活點滴,以至土瓜灣重建歷程一一整合,於即日至2月7日舉行《重「見」重「建」——土瓜灣有個展》網上展覽。

影片重現 老街坊不捨之情

呢次展覽分為「重見」和「重建」兩部份,以唔同嘅裝置藝術分享老街坊故事。展覽場館以土瓜灣進入重建歷程嘅開始為起點,現場播放幾條影片,分別介紹樓梯舖、天台戶、車房同埋聖雅各福群會對土瓜灣及呢次重建嘅睇法。

財記百貨老闆娘喺片段中就表示:「市建局收樓,街坊感情從此散啦!有啲唔捨得!」原來財記於1962年喺度開業,老闆憶述:「當年我哋賣好多棉線,呢條街當時起碼有十幾間製衣山寨廠,未婚女仔當然喺工廠工作,有小朋友嘅女工就從工廠取料在家車衣,因此就要嚟買線,完工就擺到工廠交貨。」對於前景,老闆都有啲悲觀:「重新開始一盤零售生意真係好難,我哋呢行都逐漸成為黃昏行業,以前好多樓梯舖都做我哋呢行,重建以後再搵其他舖位重新開始並唔容易。」

同樣要搬遷嘅車房,亦面對相似嘅困境,車房老闆陳紹寧喺場內另一片段中就批評,政府對呢個行業根本唔重視:「政府應該安排地方去安置車房,重建只係用錢叫人走,我哋根本唔係要呢筆錢,你只要安排地方,讓我哋繼續以此維生就可以啦。」陳紹寧於2002年到銀漢街開設車房:「當時只得四五間車房,到今日為止有廿幾三十間。」面對前景,他希望能營業至清拆前一刻,如果搵唔新舖位,就只好轉行或退休:「較新嘅地區,人哋根本不願意租俾車房,如果搬入新界就路途太遙遠,客人唔會光顧,重新再適應嘅話要好長時間,所以比較困難。」

車房樓梯舖 體驗工作日常

睇完影片,之後場區展示出重建戶面對嘅種種法律規條,繼而進入以裝置藝術重置嘅重建區生活空間,展覽取材舊區最常見嘅鐵皮材料來仿造天台戶嘅居所,凸顯佢哋嘅臨時性同不穩定嘅特質。

喺天台戶旁邊,就會展出重建區內最具特色嘅兩類店舖——車房同樓梯舖,利用樓梯舖財記百貨店主周先生贈送嘅櫥櫃等作素材,並以一比一比例重現樓梯舖嘅實際環境,走進去大家可以體驗樓梯舖麻雀雖小,五臟俱全嘅特色。另外,車房借出汽車部件和工具,俾大家了解佢哋嘅工作日常。 

場館另一部份以一封封政府與街坊往來嘅信件,講述重建區內為數最多嘅租客處於業主同市建局嘅夾縫中,需要應付諸多法律程序甚至訴訟,生活壓力係非一般人能想像。與此同時,展覽又透過文字及相片分享喺社區多年嘅長者與不斷流徙嘅少數族裔各自嘅故事同困境。 

16人大餐桌 見證土瓜灣鄰里關係

另外,展覽亦擺放咗一張大餐桌,圍住16張唔同款式嘅椅子,全部都係來自土瓜灣重建區各處,見證呢個地方幾十年來嘅變遷,亦代表土瓜灣係一個多元混雜、鄰里關係十分緊密嘅社區。場區內同時播放多位重建街坊、商戶嘅訪問,談談他們在土瓜灣的回憶和人情味。街坊英先生就分享話:「我就住在小巷內,有三個燒烤爐,有時在這裡燒烤,大家一個接一個坐下來,越坐越多,最後就會不夠食物。所以土瓜灣區有個好處,舊區有舊區的空間,還有不會很刻意,這些舊區將來會慢慢越來越少。」

於鴻福街經營車房嘅袁先生亦表示:「來到呢度工作租地舖,就好少離開,每個人最少留五六年、七八年,好多師傅都喜歡喺呢幾條街工作,因為呢度有聯繫,住樓上樓下嘅街坊,每個都會互相打招呼。」

聖雅各福群會助理總幹事馮啟民先生亦表示:「唔少重建區街坊在此居住多年,不單對社區非常熟悉,鄰里間情誼亦十分濃厚,充滿『大家隔離鄰舍,幫得就幫』嘅精神。」聖雅各福群會總幹事李玉芝則認為,土瓜灣這個地方很特別:「呢度好有人情味,好多小店,好多車房,大家會喺舖頭門外聊天,長者會放椅子喺街上坐著聊天,小朋友喺街上遊玩,感覺很特別。」她希望當區嘅社會資本、人脈資本繼續留喺區內,為未來發展注入新元素。

網上虛擬展覽 

因應新冠肺炎疫情,今次展覽將會以虛擬實境方式進行,大家由即日至2月7日期間,可以透過「聖雅各福群會市區重建社區服務隊」Facebook專頁,了解土瓜灣重建歷史、聽聽街坊訴說在土瓜灣的生活點滴,大家亦可在瞬間回到重建區,游走於街道上及小店裡,見證即將圍封清拆的重建區最後的景象。

圖片來源:聖雅各福群會、市區重建局、LOOOP.HK

《重「見」重「建」——土瓜灣有個展》網上展覽,帶大家進入重建中嘅土瓜灣,感受重建戶的生活點滴。


樓梯舖財記百資老闆表示,外面租金釨貴,所以要再搵其他舖位重新經營並唔容易。


透過影片,可以睇到天台戶嘅生活環境。

車房老闆陳紹寧,希望能營業至清拆前一刻,如找不到新舖位便會轉行或退休。


不同街坊收集的生活用品同樣可見於展場,包括不少的門牌和信箱。


展覽以一比一比例重現土瓜灣特色的樓梯舖,圖為財記百貨店。


車房借出收集回來的士椅,經改裝重新成為一張別樹一格的椅子。


16人的大餐桌代表土瓜灣是一個多元混雜、卻鄰里關係緊密的社區。 

車房老闆胡先生指,鴻福街租金好合理,而且呢一帶人流車流都唔多,所以造就好多汽車維修業喺呢度。


街坊英先生指:「土瓜灣人情味好重,街坊早前搬咗出去,有時佢哋都會返嚟,大家傾下偈,講下搬走後有無識到新街坊、新朋友呀!」 

車房老闆袁先生話,來到呢度工作租舖,就好少離會開。


一眾嘉賓於開幕禮大合照(左起:市區更新基金董事馬錦華先生MH, JP、明愛專上學院湯羅鳳賢社會科學院黃於唱教授、九龍城區議會主席蕭亮聲先生、重建區街坊英姐和聖雅各福群會助理總幹事馮啟民先生)

市建局的土瓜灣重建計劃,牽涉多個街區,包括土瓜灣鴻福街1至51號(單數)及銀漢街2至42A號(雙數)、鴻福街16至46號(雙數)及啟明街21至39號(單數)及榮光街35至37號(單數)、榮光街1至27號(單數)、啟明街4至24號(雙數)及啟明街26至 28號(雙數) 與榮光街29至33號(單數)。

土瓜灣鴻福街、銀漢街、啟明街和榮光街位置圖。