早前新冠肺炎未爆發之前好興「共享文化」,包括共享單車、共享尿袋等,近日仲出現咗「共享奶奶」。原來呢個係四川省成都市一個社區活動,社區內嘅一班婆婆,幫手照顧區內一班由於家長工作繁忙而無暇照顧嘅小朋友,同佢哋講故事、食餃子,教佢哋剪紙等。

「共享奶奶」項目始於2019年7月,社區工作人員介紹指,社區內嘅父母多數忙於工作,小朋友放學後無人照顧,亦無人輔導佢哋做功課。與此同時,社區內退休居民閒置時間多,希望多參與社會活動,於是社區就設立「共享奶奶」平台,等年長嘅婆婆幫手照顧小朋友,受照顧嘅家庭則為長者提供各類關愛回饋服務,互助互惠。

參與「共享奶奶」嘅婆婆每日都會講故事俾小朋友聽,又教佢哋識字,幫手接送小朋友,同佢哋玩遊戲等,但一班婆婆就樂此不疲,其中一位張惠英婆婆仲話:「一點都不累,每天都很充實,相互陪伴是金錢買不來的東西。」佢更表示,有時驚答唔到小朋友嘅問題,所以每日都要上網學新嘢。而令張婆婆印象最深刻嘅係,有一次佢因為身體唔舒服休息咗幾日,幾個小朋友喺家長帶領下竟然上門探訪佢,仲話:「張奶奶,幾天沒看見你了,我們都想你了」,令張婆婆心都甜曬!另外一位諸婆婆就表示,明顯感覺到社區更加和諧,鄰里關係更加親密。佢話,經常有年輕父母嚟探自己,問下自己有無嘢需要幫忙:「將心比心,大家就會越走越近。」 

圖:中新網