【城門河河水連續4日變色 網民感悲哀因污染而變靚】

上周二（19日）開始，有市民發現沙田城門河河水變色。區議員23日喺社交網站發文表示，相關情況仲未有改善。

19日起，沙田城門河大圍段嘅河水突然變色，呈現綠色。有居民表示，現場傳出疑似漂白水嘅氣味，而水面亦有少量白色泡沫。沙田區議員丘文俊（23日）下午喺其個人社交媒體發文指，城門河水呈翠綠色嘅情況未有改善，又指河水連續4日受污染，相關部門仍未肯定污染源頭。

有網民留言指，「今日（23日）河面漂浮好多細條既死魚」，又有網民指，「因為污染而變靚，真係好悲哀！」

環保署發言人早前回覆傳媒查詢時表示，接獲到5宗有關投訴，並已經派員到場以無人機配合調查，現場發現城門河近溱岸8號嘅大片河水顏色較為翠綠，河面飄浮着零星死魚，河水冇刺鼻異味或惡臭。發言人又指，調查人員沿河一帶未有發現非法排放或可疑污染源頭，經初步測試河水溶解氧及溫度都正常，已經抽取到河水樣本作進一步詳細化驗，以確定河水變綠原因。署方表示，會繼續聯同渠務署跟進調查相關集水區內嘅雨水渠，查獲到非法排放源頭，一定會採取相應執法行動。