好多人都鐘意親親大自然,嚮往住喺郊外,不過如果當你嘅屋企變成動物園咁,大家又敢唔敢住呢?南非有對夫婦,為咗幫爸爸處理賣屋事宜,到訪待售嘅吉屋,點知一打開門,竟然見到有成6隻獅子喺露台度曬太陽,嚇到佢哋鼻哥窿都無肉。屋主將所見擺上社交平台,引來網友爆笑討論,笑稱新買家有著數:「買屋附送大貓」。

屋主David De Beer發帖表示,自己本來同妻子前往處理爸爸待售嘅吉屋。點知佢哋一開門,就見到已經有6隻獅子搶先入住吉屋,懶洋洋咁攤喺露台曬太陽。獅子們聽到有人開門,亦嚇到即刻彈起身,呆呆咁望住門口,但好快就放低戒心,各自漫步,當正自己屋企咁自在。

David解釋話,其實當時喺前門已經見到有不停晃動嘅尾巴,知道有動物喺附近,於是小心翼翼咁開門。佢指已經習慣有動物喺屋企附近出沒,但都係要小心保持距離:「獅子躺在露台的情況並不常見,牠們還是有可能會衝破玻璃」。

不少網友留言笑指間屋係獅子嘅樂園:「這就是我在找的屋,裡面有比狗還厲害的看門貓」、「在這裡住一定不用擔心竊盜案」、「買屋居然附送大貓」。

圖:FB@David De Beer