就算幾鐘意打鼓都好,要連續打24個鐘都真係唔係個個頂得順。加拿大薩斯喀徹溫省一位樂隊鼓手Jared Dormer,因為疫情關係閒賦在家。早前佢忽發奇想,挑戰馬拉松式連續用木箱鼓演奏超過25個鐘,唔單止超出健力士世界紀錄規定嘅至少24個鐘嘅要求,更創下連續打鼓25小時42分34秒嘅世界紀錄。 

Jared今個月15號喺社交平台直播演奏過程,翌日完成創舉。佢表示,挑戰令手臂疲憊不堪,左手亦泛紅腫脹,但創下世界紀錄嘅滿足感難以言喻。為咗準備呢個挑戰,Jared用咗6個月時間準備,而佢為咗證明自己並非只擅長某種風格或節奏嘅音樂,喺挑戰嗰陣揀咗多種風格嘅樂曲,包括演奏慢歌、快歌、流行歌及聖樂等。佢又指,樂隊喺疫情下無法公開表演,佢能夠再次喺人們面前表演,感覺非常美妙。

圖:FB@ Jared Dormer