好多動物都有準備食糧過冬嘅習慣,所以如果發現呢啲「意外之財」都唔可以貪心拎咗去!湖南有個女子上山砍柴嗰陣,意外發現一個有幾十斤栗子嘅洞,於是開心拎返屋企,仲擺上網分享。不過,好快就有網民指出呢啲可能係松鼠冬天嘅存糧,直批評佢:「缺那點吃的嗎,松鼠一夏天辛苦採的。」

據內地傳媒報道,湖南長沙有個女子去砍柴嗰陣,意外發現一個山洞,入面竟然有栗子,於是不停用棍整出來,仲話:「幾十斤,弄不完,冬有板栗應該是這樣來的」。佢拎咗栗子返屋企之後,用大鐵桶裝起影相,更剝開栗子展示果肉。點知網民一面倒轟女子:「對你來說是免費的板栗,松鼠沒它會死,你沒它活得好好的」、「缺那點吃的嗎,松鼠一夏天辛苦採的,就讓他全拿了」、「快放回去,動物的年貨」、「栗栗皆辛苦」。

好在,女子捱罵後良心發現,聽完大家意見後決定拎去還,仲送上自家烤紅薯當「賠禮」道歉。網民仲留言提醒佢要向松鼠講聲對唔住。

圖:微博