「鬼口水」（slime）係唔少小朋友鍾意玩嘅玩具，喺內地亦被稱為「網紅玩具」。19日，內地媒體央視財經台就為「鬼口水」進行檢測，發現「鬼口水」均含有硼砂。專家相信，假如小朋友玩完「鬼口水」後唔洗手就食嘢，容易攝入到硼於體內，影響健康。

此外，央視財經記者隨機喺市場購買咗4種唔同廠家生產嘅「鬼口水」，並委託實驗室檢測。結果透過試紙測試發現，4款鬼口水都含有硼，並且均全部超出歐盟標準每千克300ppm，其中2號樣本超標近3倍。 

1號樣本：硼遷移量387.7ppm

2號樣本：硼遷移量826.2ppm

3號樣本：硼遷移量338.7mg

4號樣本：硼遷移量564.7mg

北京交通大學理學院副院長唐愛偉教授表示，如果唔注意衛生，唔洗手就直接進食，硼砂或會隨住食物進入人體，有可能對身體造成嚴重危害。 

以下係硼砂進入人體致中毒或致死量︰

成人中毒量：1-3g

成人致死量：15g

兒童致死量：5g

嬰幼兒致死量：2-3g

加上，「鬼口水」質地黏軟，極易粘喺皮膚上，若果小朋友經常接觸，或會造成皮膚過敏。如皮膚有破損，再接觸硼砂，毒副作用會顯現得更快更大。北京交通大學理學院教師梁本亮表示，硼砂經過胃酸後，可能會形成硼酸，影響人嘅食慾，最終抑制營養素嘅吸收。因為硼砂毒性較高，包括中國在內嘅世界多國，都禁止其作為食品添加劑。

圖片及資料來源︰央視財經頻道 

市面上售賣嘅「鬼口水」樣式花樣百出。